ضل الضحى الرامي

التجاني حاج موسى

ضل الضحى الرامي
ـــــــــــــــــــــــــــــــــ

ضل الضحى الرامي
وشمس شتوية دفايه
وريحة البن لما يفوح في قلايه

جدي وفروة جدي وصورة
ولمان جيت أمد إيدي
جدي أديني تعريفه
بتقرأ الحمدو ياالمبروك
بقراها وعشان تعريفه القاها
أجود في القرايا كمان
وين يا دنيا ولى زمان

سعف حبوبة والحنقوق
والطورية والواسوق
وصوت سعدية بت جيرانا
تشحد ليها في طايوق
وصوت عرفه بتخنق الدلوكه غنايا

وحبة فريك لموه لى رمضان
مصرور فى مخلايه
صور محفورة في الداخل
صور محفورة جوايا
عشان الليله وعشان باكر وبعد باكر
عشان الزمان غدار و ما معروف
زماناً كلو خوف في خوف

مشتاق يا يمه لى ملاح النعيمية
وريحة صاجك المحروق لما تسوي طعمية

وغباشة روب وعنزه حلوب
بدور ارحل أجيكي هناك
ضاقت بيا يمة هنا
بدور اتمسى بى عينيك واصابحك يا صباحي انا
صباح الخير على عيونك
وأتاري الدنيا من دونك
شينة و مرة ما بتندار
ومرة مرارة يا يمه دي مرة وحارى زى النار

ولو بتدوري أحكي لك عن احوالي في البندر
من وين عايزا أبدا لك أبدأ بس من وين ؟
مو شيتاً غريب وعجيب وسيتاً كلو شين في شين
هنا الزول العديل يعيش يوماتي بى وشين
وزولتي الحتى حبيتا وحاتك انتي يا الغالية
لقيتا بلاي تحب زولين

وايه يا يمه والله زمان
دي قشة عينى من النوم معاى بشيل هموم باكر
قبل ما اشيل هموم اليوم اختها خطواتى الأولى
اعدى الباب تدق طبول الهم
خواطر تذهل الألباب واقابلك يا شوارع الجن
وفى جوايا حاجة تئن اشد وتر الحزن واعزف
تموت غنواتى يا يمه ويخنقنى الغنا وأنزف
وتنتر فى العروق حمى خيال بيتنا القديم يرجف

صور تنزاح وتتلم وتانى وتالت آيمه
واشوفك بى خيال حالم تشاورى وترقص السبحة
ملامح العابد الصايم تشع فوق جبهتك سمحة
وشييك يحاكى ضى النور مزدان يمه فى الطرحه
وتبسمي لى أمد ايدى اقول اتلاقى يا السمحة
يتلاشى الحلم واصحى ويدفق عرق مالح
ويسكن فينى كل الهم واشم ريحة ندم جارح
وارفس عصفورة منجرحه فارقت الفضاء البارح
وتانى وتالت آيمه وهم كل المداين وهم
وهم غرقانه فى زخم الحضاره الغم
حضارة بتحصد الإنسان وتزرع فى مكانه نغم
وقصد القول .. يا شايل اللوم ويما جابنى للبندر
وحاتك انتى يا الغالية ده يوماً شوم
ولا بسنى الخجل من راسى لى كرعى
شايلو وأحوم وهادي الحالة فى الخرتوم
زي عايش شقى ومهموم .

» فنان جبنة في ضل الضحى